Novruzəli Məmmədovun ölümü ilə bağlı araşdırma başa çatıb

İş üzrə cinayət işinin başlanması rədd edilib

Azərbaycan Milli Elmlər Akademiyasının Dilçilik İnstitutunun sabiq bölmə müdiri, “Tolişi Sədo” qəzetinin baş redaktoru Novruzəli Məmmədovun ölümü ilə bağlı aparılan araşdırmalar artıq başa çatıb.

Bu barədə APA-ya Nizami rayon prokurorunun köməkçisi Nəsir Fərzəliyev məlumat verib.

Prokuror köməkçisinin sözlərinə görə, N.Məmmədovun xəstəlikdən dünyasını dəyişdiyi dəqiqləşib: “Ölüm hadisəsi tərəfimizdən obyektiv araşdırılıb. Hadisəni araşdıran istintaq qrupunun gəldiyi qənaətə görə, Məmmədov baş beynin işemik infarktından dünyasını dəyişib. Məhz buna görə də ölüm hadisə ilə bağlı cinayət işinin başlanması rədd edilib”.

Qeyd edək ki, Novruzəli Məmmədov bu il avqustun 17-də Ədliyyə Nazirliyi Penitensiar Xidmətin Müalicə Müəssisəsində dünyasını dəyişib. O, Cinayət Məcəlləsinin 274-cü (dövlətə xəyanət) və 283-cü (milli, irqi, dini düşmənçiliyi yayma) maddələri ilə ittiham olunaraq, 10 il müddətinə azadlıqdan məhrum edilmişdi.