PPK üzvü olan azərbaycanlı öldürülüb

Terrorçu Türkiyədə basdırılıb

8-16 sentyabr tarixlərində Türkiyə Silahlı Qüvvələrinin Hakkarinin Çukurça rayonunda, Qazan vadisində PKK terror təşkilatına qarşı apardığı hərbi əməliyyatlarda Cənubi Azərbaycanın Xoy şəhər sakini, “Məzlum Azəri” kod adlı Yəhya Musazadə öldürülüb.

Lent.az-ın verdiyi məlumata görə, bu barədə PKK terror təşkilatına yaxın “Fırat” xəbər agentliyi informasiya yayıb.

Bu gün terrorçunun cəsədi Hakkari Dövlət Xəstəxanasından götürülüb və Hakkaridəki “Tekser” qəbiristanlığında dəfn edilib. Dəfn mərasimində çoxlu sayda PKK tərəfdarı, DTP-li bələdiyyə sədri Fadıl Bedirhanoğlu, DTP-nin rayon təşkilatının sədri Huvzullah Kansu və digər DTP-lilər iştirak ediblər.

Qəbiristanlıqda çıxış edən DTP rayon təşkilatının sədri Huvzullah Kansu deyib ki, Yəhya Musazadə kürd deyil, azərbaycanlı olub, ancaq qardaşlıq üçün bu mübarizəyə qatılıb. O, qorxularından İrandan terrorçunun dəfninə gələ bilməyən ailə üzvlərinin rahat olmalarını, Yəyhanın dəfnində çoxlu sayda insanın iştirak etdiyini söyləyib.

Qeyd edək ki, bu hərbi əməliyyatlar nəticəsində Türkiyə Silahlı Qüvvələri 8 terrorçunu zərərsizləşdirib.