0,472 qram heroinə görə 7 illik həbs cəzası

Sentyabrın 17-də Ağır Cinayətlərə Dair İşlər üzrə Məhkəmədə narkotik vasitələrin satışında təqsirləndirilən Gəncə şəhər sakini Ramil Hüseynova hökm oxunub.

Lent.az-ın məlumatına görə, hakim Əlövsət Abbasovun sədrliyi ilə keçirilən məhkəmə prosesində təqsirləndirilən R.Hüseynov Cinayət Məcəlləsinin 234.2-ci (satış məqsədi ilə qanunsuz olaraq narkotik vasitələri və ya psixotrop maddələri əldə etmə və saxlama, hazırlama, istehsal etmə, emal etmə, daşıma, göndərmə, yaxud qanunsuz olaraq narkotik vasitələri və ya psixotrop maddələri satma) maddəsi ilə təqsirli bilinərək 7 il müddətinə azadlıqdan məhrum edilib.

Məhkəmə R.Hüseynovun daha əvvəl məhkum edilmiş şəxs olduğunu cəzanı ağırlaşdıran, himayəsində iki azyaşlının olmasını isə cəzanı yüngülləşdirən hal kimi qiymətləndirib.

Qeyd edək ki, 2009-cu il fevral 19-da Gəncə şəhəri Nizami rayon Polis bölməsi əməkdaşlarının keçirdiyi əməliyyat-axtarış tədbirləri nəticəsində Gəncə sakini, 1977-ci il təvəllüdlü Quliyev Ramin Füzuli oğlundan 0,472 qram narkotik vasitə olan heroin aşkarlanaraq götürülüb.

Fərid Əkbərov