Türkiyədə xədimlərin sayı arta bilər

Qadın millət vəkilləri uşaqlara cinsi təcavüz edənlərlə bağlı qanun layihəsi hazırlayıblar

Türkiyənin hakim partiyası AKP-nin qadın millət vəkilləri Alev Dedegil və Aşkın Asan uşaqlara cinsi təcavüz edənlərlə bağlı sərt qanun layihəsi hazırlayıblar.
Lent.az-ın Türkiyənin NTV telekanalına istinadən verdiyi məlumata görə, onların hazırladığı qanun layihəsində müxtəlif cəzalar, o cümlədən uşaqlara cinsi təcavüz edənlərin xədim edilmələri barədə müddəa da var.
Alev Dedegil deyib ki, belələri kimyəvi dərmanlarla xədim edilməlidirlər. Eyni zamanda, onların evləri, malları və pulları müsadirə olunmalı, ali məktəb diplomları ləğv olunmalı, həbsdən sonra həmin şəxsin cinsi təcavüzə uğramış uşaqla eyni şəhərdə yaşaması qadağan edilməlidir.
Millət vəkili istintaq dövründə uşağın ona cinsi təcavüz edənlə bir yerdə hadisə yerinə aparılması prosedurunun da ləğvini tələb etdiklərini vurğulayıb.
Qanun layihəsi 2 ay müddətində hazırlanıb və Türkiyədəki qeyri-hökumət təşkilatlarının əksəriyyəti layihəni dəstəkləyib. Bu səbəbdən də qanun layihəsinin parlamentdə qəbul edilməsi ehtimalı yüksək sayılır.