"Access" Bankın sabiq əməkdaşı tutuldu

DİN Baş Mütəşəkkil Cinayətkarlıqla Mübarizə İdarəsi əməkdaşlarının keçirdikləri əməliyyat-axtarış tədbirləri nəticəsində Bakı sakini olan 3 nəfər tutulub.

Lent.az-ın Daxili İşlər Nazirliyinin saytına istinadən məlumatına görə, Bakı şəhər sakinləri "Access" Bankın sabiq işçisi Ceyhun Bağırov, Anar Abdullayev və Tofiq Əliyev bankdan kredit götürmək məqsədi ilə Bakıxanov qəsəbəsində kirayə yaşayan Masallı rayon sakini Rəmiş Mirzəyevdən 1000 manat pul alıb, onun kirayədə qaldığı evin şəhadətnaməsini və ona məxsus avtomaşına dair texniki pasportu saxtalaşdırdıqlarına görə saxlanılıblar.

T.Əliyevin evinə baxış zamanı saxta sənədlər hazırlamaq üçün nəzərdə tutulmuş 1 ədəd skaner, 1 ədəd prosessor, ayrı-ayrı nazirliklərin, notariat kontorlarının və digər təşkilatların sənədlərinin, diplomların, möhürlərin, blankların, ştampların nümunələri aşkarlanıb.