Neftçalada tükürpədici hadisə

Yanvarın 18-də Neftçala rayonunda dəhşətli hadisə baş verib. Rayon Prokurorluğundan Lent.az-a verilən məlumata görə, Neftçala sakini, 1956-cı il təvəllüdlü Mehnətova Məhəbbət Qurban qızı yaşadığı evdə diri-diri yanıb.

Məlumatda bildirilir ki, 55 yaşlı qadın anadangəlmə ruhi xəstə və I qrup əlildir. Belə ki, o, yeriyə bilmir. Mərhum dünən axşam saatlarında evdə üşüyüb, isinmək üçün sürünə-sürənə elektrik sobasının yanına gedərək əllərini isitmək istəyib. Bu zaman sobanın istiliyindən qadının üst geyimi yanmağa başlayıb. 55 yaşlı əlil qadın yeriyə bilmədiyindən sobadan uzaqlaşa bilməyib və özünü xilas etmək istəyi baş tutmayıb.

Qeyd edək ki, 55 yaşlı M.Mehnətova evdə tək yaşayırmış. Qardaş onun üçün ayrı ev tikibmiş. Hadisə baş verən zaman yaxınlıqda yaşayan qohumlar qoxu hiss edərək onun yaşadığı evə gəliblər və M.Mehnətovanı alov içində görüblər. Lakin artıq gec olub.

Faktla bağlı Neftçala rayon Prokurorluğunda araşdırma aparılır.

Nizam Rza