“Qarabağ” əcnəbi futbolçular alacaq
03 yanvar 2011 18:41 (UTC +04:00)

“Qarabağ” əcnəbi futbolçular alacaq

Ağdamın “Qarabağ” futbol klubu qış transfer dövründə əcnəbilərlə güclənəcək. Bu haqda Lent.az-a komandanın baş məşqçisi Qurban Qurbanov məlumat verib.


Onun sözlərinə görə, yerli futbolçu transferi səviyyəli oyunçuların hazırda öz klubları ilə müqavilələrinin olması səbəbindən baş tutmayacaq. Qurbanov legionerlərin hansı mövqelərə transfer ediləcəklərini açıqlamayıb: “Yanvarın 9-da Türkiyənin Antalya şəhərinə təlim-məşq toplantısına yollanacağıq. 27 günlük hazırlıq prosesi çərçivəsində bir neçə oyunçunu sınaqdan keçirəcəyik. Münasib legioner tapsaq, müqavilə bağlayacağıq. 2-3 futbolçu ilə güclənmək niyyətindəyik. Amma hansı mövqelərə uyğun oyunçu alacağımızı indidən deyə bilmərəm”.


38 yaşlı mütəxəssis mövsümün sonunadək müqaviləsi olan Elvin Məmmədova yeni sövdələşmə təklif edildiyini də bildirib. Qurbanovun sözlərinə görə, Azərbaycan milli komandasının yarımmüdafiəçisi düşünmək üçün vaxt istəyib: “Elvin Antalyada bizimlə olacaq. Həmin vaxt futbolçumuzla yenidən danışacağıq. Məmmədov klub rəhbərliyinin təklifini qəbul etsə, yeni müqavilə bağlayacaq. Əks halda, onunla mövsümün sonunadək anlaşmamız qüvvədə olacaq”.


Baş məşqçi Elvin Məmmədovla problemlərinin yarandığı haqda xəbərləri də təkzib edib. Onun fikrincə, indiyədək gənc yarımmüdafiəçi ilə münasibətləri qaydasında olub.

Qeyd edək ki, “Qarabağ” klubu bu yaxınlarda 5 futbolçusu – Rauf Əliyev, Əfran İsmayılov, Maksim Medvedev, Qara Qarayev və Ansi Aqolli ilə müqavilə müddətini uzadıb. Heyətindəki oyunçuların əksəriyyəti yerlilərdən ibarət olan “Qarabağ”da cəmi 5 legioner - Admir Teli, Ansi Aqolli (hər ikisi Albaniya), Georgi Adamiya (Gürcüstan), Andrey Rubins (Latviya), Devran Ayhan (Türkiyə) var.

Elşən MƏMMƏDOV
# 531

Oxşar yazılar