Rusiyada təyyarə qəzası: 12 ölü

Dekabrın 28-də saat 20:30 radələrində Rusiyanın Tula vilayətində “Antey -22” markalı hərbi-nəqliyyat təyyarəsi qəzaya uğrayıb.

Lent.az-ın “Exo Moskvı” radiosuna istinadən verdiyi məlumata görə, təyyarədə olan 12 nəfər həlak olub.

Hərbi Prokurorluq cinayət işi açıb. Hərbi-nəqliyyat təyyarəsi Tula və Orlov vilayətlərinin sərhədində, saat 20:30 radələrində radarlardan itib. “Antey -22” Voronej aeroportundan Tulaya uçurmuş. “Antey -22”-də əsas pilotlar və əvəzedici heyət olub. Təyyarənin qalıqları bu gün səhər saatlarında Tula vilayətinin Krasnıy Oktyabr qəsəbəsi yaxınlığında aşkar edilib.

Müdafiə Nazirliyi təyyarənin texniki nasazlıq üzündən qəzaya uğradığını ehtimal edir. Pilotların səhvi, yaxud mühərrikə quşların düşməsi səbəbindən də təyyarənin qəzaya uğraması istisna edilmir.

Təyyarə 1974-cü ildə istehsal edilib, istismar müddəti 36 ildir.