İki yük qatarı toqquşub

Dekabrın 27-də gecə saat 03:15-də Mingəçevir-Goran mənzilinin 227-ci kilometrində Bakıya doğru saatda 22 km sürətlə hərəkət edən yük qatarı həmin yolda qarşıda işıqforda dayanmış yük qatarı ilə toqquşub.

«Azərbaycan Dəmir Yolları» QSC-in mətbuat katibliyinin rəhbəri Nadir Əzməmmədovun «APA-ECONOMICS»ə verdiyi məlumata görə, toqquşma nəticəsində qarşıdakı qatarın təkər cütü relsdən çıxıb və bununla da dəmir yolunun həmin hissəsi bağlanıb. Artıq «Fövqəladə Hallar Qatarı» MMC-nin Yevlax bölməsi hadisənin nəticələrini aradan qaldırıb. Hadisə nəticəsində xəsarət alan olmayıb, lokomotivə ziyan dəyməyib. Hadisənin vurduğu ziyanın müəyyən edilməsi üçün xüsusi komissiya işləyir.

Hadisə nəticəsində respublikanın qərb hissəsinə və əks istiqamətdə hərəkət edən qatarların hərəkətində problem yaranıb. Belə ki, hadisə nəticəsində Bakı-Tiflis və Bakı-Ağstafa sərnişin qatarları hadisə yeri ilə Bakı arasında, Tiflis-Bakı qatarı isə hadisə yerinin digər tərəfində dayanmalı olub. Yol açılandan sonra qatarların hər üçü hərəkəti davam etdirib.