Ölən zəvvarların cəsədlərinin bu gün Bakıya gətiriləcəyi gözlənilir

Türkiyədə qəza nəticəsində ölən və yaralanan azərbaycanlı zəvvarların bir qrupu bu gün günortadan sonra Bakıya yola salına bilər. Bu barədə Lent.az-a Azərbaycanın Türkiyədəki səfirliyinin mətbuat xidmətinin rəhbəri Elsevər Salmanov məlumat verdi. O, həmçinin bildirdi ki, yaralılardan 7-nin vəziyyəti xüsusilə ağırdır: “Bizdə olan rəsmi məlumata görə, 5 nəfər ölüb, 29 nəfər yaralanıb. Onlardan 7-nin vəziyyəti daha ağırıdır, ancaq həmin şəxslərin adlarını hələlik açıqlaya bilməyəcəm. Bu barədə Sivas valiliyindən rəsmi məlumat gəlməyib”.

Səfirlik rəsmisi onu da bildirdi ki, qəza xəbəri yayılan kimi İstanbuldakı nümayəndəlikdən bir qrup işçi təcili qəza baş verən yerə yollanıb: “Qəzadan bir neçə sat sonra isə, gecə saatlarında cənab səfir Faiq Bağırov özü Sivasa yollandı. Hazırda orda təşkilati məsələlər həll olunur. Güman var ki, bu gün günortadan sonra xüsusi aviareyslə yaralılardan bir qrup və dünyasını dəyişmiş insanların cəsədi Azərbaycana göndərilsin. Lakin bu məsələ hələ dəqiq həllini tapmayıb”.

Qeyd edək ki, azərbaycanlı zəvvarları daşıyan avtobus Sivasın Şarıqışla rayonunun Dökmetaş kəndində qəzaya uğrayıb. Asif Babayevin (45 yaş) idarə etdiyi 90 DS 393 yoldan çıxaraq, aşıb.

Nizam Rza