Zərdabın hərbi komissarı Şirvan Şəhər Polis Şöbəsində ölüb

Bu barədə APA-ya Şirvan Şəhər Polis Şöbəsindən məlumat verilib.

Hadisə ötən gecə qeydə alınıb. Rayonun Heydər Əliyev prospektində üç avtomobilin toqquşması barədə polisə məlumat daxil olub. Daxil olan məlumat əsasında hadisə yerinə əməliyyat qrupu çıxıb. Araşdırmalar nəticəsində məlum olub ki, Rauf Hüseynovun idarə etdiyi “Volkswagen Touareg” markalı, 10 XZ 669 dövlət nömrə nişanlı avtomobil Nizami Məmmədovun idarə etdiyi “Mercedes” markalı və Saday Məmmədovun idarə etdiyi “Hyundai” markalı maşınlarla toqquşub. Nəticədə N. Məmmədov və S. Məmmədov müxtəlif bədən xəsarətləri ilə xəstəxanaya yerləşdiriliblər.

Qəzanın baş verməsinə R. Hüseynovun sərxoş vəziyyətdə avtomobili idarə etməsi səbəb olub. Sürücünün sərxoş olduğunu görən əməliyyatçılar onu tibbi müayinədən keçmək üçün xəstəxanaya aparmaq istədikdə R. Hüseynov polis əməkdaşlarını təhqir edib. Nəticədə polis R. Hüseynovu saxlayaraq şöbəyə aparmaq məcburiyyətində qalıb. R. Hüseynov şöbədə bir daha polis əməkdaşları ilə mübahisə edib. Nəticədə o, ürək tutmasından yerə yıxılıb. Hadisə yerinə təcilli tibbi yardım çağırılsa da, onu xilas etmək mümkün olmayıb.

Polisdən həmçinin bildirilib ki, şöbədə ürək tutmasından ölən R. Hüseynov Zərdab rayon hərbi komissarıdır. O, Şirvanda toy mərasimindən qayıdırmış.

Faktla bağlı araşdırmalar davam etdirilir.