Bakıda oğru dəstəsi tutuldu

Market və kiçik ərzaq dükanlarından oğurluq edən şəxslər Nizami rayon 25-ci polis bölməsinin əməkdaşları tərəfindən yaxalanıblar.

İdarədən Lent.az-a verilən xəbərdə deyilir ki, Orxan Abdullayev, Vüqar Bayramov, Kamran Hüseynov və Ruslan Hüseynov gecə saatlarında bir neçə market və dükanların şüşəsini sındırma yolu ilə içəri girib kassada olan pul və ərzaq məhsullarını oğurladıqlarına görə saxlanılıblar. Onlar Nizami rayonu Kürçaylı küçəsindəki Məhərrəm Cəlilova və sahibkar Rəna Həsənovaya məxsus marketlərdən də eyni qaydada oğurluq edərək, hadisə yerindən qaçıblar.

Məlumatda bildirilir ki, bu ilin avqust ayından axtarışda olan dəstə üzvləri planlı şəkildə oğurluqlarda iştirak ediblərmiş. Biri pusquda durmaqla digərləri içəri keçən dəstə üzvləri qarət etdikləri marketlərdə 7 dəqiqədən artıq dayanmayıblar.

Dəstənin daha necə oğurluq hadisəsində iştirak etdiyi dəqiqləşdirilir.

Natiq Qədimov