DİN: 1 nəfər özünü MSK-nın qarşısında yandırmaq istəyib

Bu barədə Lent.az-a Daxili İşlər Nazirliyinin Mətbuat Xidmətinin rəis müavini Ehsan Zahidov məlumat verib: “Bu gün ictimai asayişin kobud şəkildə pozulmasına yol verilməyib. Seçki məntəqələrinin və seçicilərin təhlükəsizliyi yüksək səviyyədə təmin olunub”.

E.Zahidov onu da bildirdi ki, bir neçə məntəqədə xırda hadisələr baş verib: “Bir neçə yerdə məntəqə və dairə seçki məntəqəsinin sədrləri polis əməkdaşlarını dəvət ediblər və həmin yerlərdə qayda pozuntusunun qarşısı dərhal alınıb. Bir hadisə isə Binəqədi rayonunda qeydə alınıb. Saat 15:20 radələrində Biləcəri qəsəbə sakini olan Ayaz Qocamanov MSK-nın qarşısına gələrək özünü yandırmaq istəyib. Lakin əməkdaşlarımız vaxtında müdaxilə ediblər, intihara cəhdin qarşısı alınıb. Həmin şəxs sonrakı araşdırma aparılması üçün Binəqədi rayon Polis İdarəsinə dəvət olunub”.

E.Zahidov həmçinin qeyd etdi ki, həmin şəxsin hərəkətinin seçkilərə aidiyyatı olmayıb: “Sonradan məlum oldu ki, kiminsə ona pul borcu var imiş və Qocamanov diqqəti cəlb etmək üçün MSK-nın qarşısında intihara cəhd edib”.

Nizam Rza