Məscidə edilən silahlı basqının təşkilatçısı tutuldu

Bu barədə APA-ya açıqlamasında Lənkəran rayon Polis Şöbəsinin rəis müavini Cavid Ağayev məlumat verib. Onun sözlərinə görə, həyata keçirilən xüsusi əməliyyat nəticəsində məscidin qarşısına toplaşmış dinc sakinlərə odlu silahdan atəş açan Arif Feyzullayev tutularaq istintaqa təhvil verilib. Hadisənin digər iştirakçıları, Masallı rayon sakinləri Zamin Sadıqov, Elvin Mirzəyev, Orxan Dəyyazov, Sadiq Həsənov və Lənkəran rayon sakini Emin Bəşirovun axtarışı isə davam etdirilir.

Qeyd edək ki, məlum hadisə sentyabrın 3-də saat 00.15 radələrində Lənkəran rayonunun Qumbaşı kəndi ərazisində qeydə alınıb. Masallı rayonu istiqamətindən bir neçə minik maşınında gələn silahlı şəxslər Qumbaşı kənd məscidinin qarşısına toplaşmış yerli sakinlərə “Vinçester” markalı silahdan atəş açıblar. Atəş nəticəsində kənd sakini, 1969-cu il təvəllüdlü Elşən Əliməmməd oğlu Hüseynov qətlə yetirilib. Digər kənd sakini, 1985-ci il təvəllüdlü Ramin Baloğlan oğlu Ağamalıyev isə döş qəfəsindən aldığı güllə yarası ilə Lənkəran Mərkəzi Rayon Xəstəxanasının (MRX) reanimasiya şöbəsinə yerləşdirilib. Həyata keçirilən əməliyyat axtarış tədbirləri nəticəsində hadisə iştirakçılarından ikisi - Masallı sakinləri Ramil İlham oğlu Hümbətov və Emin Bağırov saxlanılıb.