Azərbaycan Rusiyaya əlavə qüvvələr göndərə bilər

Rusiya tərəfdən müraciət olarsa, Azərbaycan Fövqəladə Hallar Nazirliyi (FHN) bu ölkəyə yanğınlarla mübarizə məqsədi ilə əlavə qüvvələr göndərə bilər.

APA-nın məlumatına görə, bunu Azərbaycan FHN-in Aviasiya Dəstəsinin rəisi, polkovnik Əşrəf Qasımov bildirib.

FHN-in qonşu dövlətin istəyinə uyğun olaraq canlı qüvvə və texnika göndərmək imkanına malik olduğunu deyən Ə. Qasımov nazirliyin hazırda yanğınsöndürmə əməliyyatlarında istifadə olunan 1 ədəd «Be-200 ÇS» markalı amfibiya təyyarəyə, 4 ədəd Mi-17 və 2 ədəd Ka-32 tipli helikopterə malik olduğunu söyləyib.

Ə.Qasımov onu da vurğulayıb ki, FHN-in Aviasiya Dəstəsi bu günə qədər yalnız ölkə ərazisində yanğınsöndürmə əməliyyatlarına cəlb olunub. Bu gün isə ilk dəfə olaraq ölkə xaricində – Rusiyada meşə yanğınları ilə mübarizə tədbirlərinə qatılır.

Qeyd edək ki, avqustun 3-də Azərbaycan FHN-in 1 ədəd Mi-17-1B və 1 ədəd Ka-32A tipli helikopteri və 19 nəfər heyəti meşə yanğınları ilə mübarizə aparmaq üçün Rusiyanın Voronej və Lipetsk şəhərlərinə yola düşüb.