FHN kömək üçün Rusiyaya iki helikopter göndərib

Bu helikopterlər Voronej və Lipetsk şəhərlərinin yaxınlığında meşə yanğınlarının qarşısının alınmasında iştirak edəcək

Azərbaycan Fövqəladə Hallar Nazirliyi Rusiyada meşə yanğınları ilə əlaqədar bu ölkəyə iki helikopter göndərib.

APA-nın məlumatına görə, yanğınsöndürən vertolyotlar 19 nəfərlik heyətlə bu gün Heydər Əliyev Beynəlxalq Hava Limanından Rusiyaya yola düşüb. FHN-in Aviasiya Dəstəsinin rəisi, polkovnik Əşrəf Qasımov jurnalistlərə açıqlamasında Rusiyaya göndərilən vertolyotlardan birinin “Mi-17-1B” markalı, digərinin isə “Ka-32A” markalı yanğınsöndürən helikopteri olduğunu qeyd edib.

Bu helikopterlər Rusiyanın Voronej və Lipetsk şəhərlərinin yaxınlığında meşə yanğınlarının qarşısının alınmasında iştirak edəcək. Nümayəndə heyətinin Rusiyada iki həftə qalacaqlarını vurğulayan Ə. Qasımov zərurət yaranacağı təqdirdə, bu müddətin uzana biləcəyini də istisna etməyib. O, helikopterlərin yanğınsöndürmə işlərinə sabahdan başlayacağını də sözlərinə əlavə edib.