3 il axtarılan ev oğrusu yaxalanıb

Bakıda 3 ildə 8 evi soyan şəxs Cinayət Axtarış İdarəsinin əməliyyatı nəticəsində tutulub

Son 3 ildə 8 evi soyan oğru iyulun 10-da tutulub. Bakı şəhər Baş Polis İdarəsindən Lent.az-a verilən məlumata görə, evlərdən pul, qızıl-zinət əşyaları oğurlamaqda şübhəli bilinən Ramin Soltanov Bakı şəhər Baş Polis İdarəsinin Cinayət Axtarış İdarəsinin əməkdaşlarının keçirdiyi əməliyyat tədbirləri nəticəsində yaxalanıb.

Martın 7-də S. Vəzirov küçəsində yaşayan Seyfəli Məmmədovun mənzilindən dəmir barmaqlıqları sındırmaq yolu ilə qızıl-zinət əşyaları oğurlamaqda şübhəli bilinərək axtarılan şəxsin daha əvvəllər də bir neçə oxşar oğurluqlar etməsi aşkarlanıb.

Məlum olub ki, Ramin Soltanov 2008-ci ildə Xətai rayonu ərazisində Nazilə Əhmədovanın, 2009-cu ildə müxtəlif vaxtlarda Polad Paşayevin, Aynur Aytarın, Qadir Həsənovun, 2010-cu ilin fevral, mart aylarında Heydər Tağıyevin, Ramin Məmmədovun və Rüfət İsmayılovun mənzillərindən pul və qızıl-zinət əşyaları oğurlayıb.

Vüqar Baba