“Ermənilər belimə bomba qoyublar” deyənə 3 il həbs cəzası

Mayın 24-də Ağır Cinayətlərə Dair İşlər üzrə Məhkəmədə bomba qoyulması ilə bağlı yalandan məlumat verən Beyləqan rayon sakininin cinayət işi üzrə məhkəmə prosesi başa çatıb.

Lent.az-ın məlumatına görə, hakim Dadaş İmanovun sədrliyi ilə keçirilən prosesdə təqsirləndirilən 1988-ci il təvəllüdlü Xəlilov Mirani Firəddin oğluna hökm oxunub. Hökmə əsasən, M.Xəlilov 3 il müddətinə azadlıqdan məhrum edilib.

İttihama görə, bu il yanvarın 20-də naməlum şəxs Fövqəladə Hallar Nazirliyinin “112” xidmətinə zəng edərək “ermənilər belimə bomba qoyublar” deyərək telefonu qapadıb. Əməliyyat tədbirləri nəticəsində məlumat təsdiqini tapmayıb. Aparılmış araşdırmalar zamanı zəngin Mirani Xəlilov tərəfindən edilməsi müəyyənləşib.

Qeyd edək ki, M. Xəlilov Azərbaycan Respublikası Cinayət Məcəlləsinin 216-cı (terror barədə yalandan məlumat vermə) maddəsi ilə ittiham olunub.

Fərid Əkbərov