Ərini öldürən gənc qadına 9 il həbs cəzası verildi

Mayın 11-də Ağır Cinayətlərə Dair İşlər üzrə Məhkəmədə ərini öldürməkdə təqsirləndirilən Sumqayıt şəhəri sakininin cinayət işi üzrə məhkəmə prosesi yekunlaşıb.

Lent.az-ın məlumatına görə, hakim İradə Həsənzadənin sədrliyi ilə keçirilən prosesdə təqsirləndirilən 1980-ci il təvəllüdlü Yelena Şıxəliyevaya hökm oxunub. Hökmə əsasən, Y.Şıxəliyeva 9 il müddətinə azadlıqdan məhrum edilib.

İttihama görə, 2009-cu il noyabrın 30-da Sumqayıt şəhər sakini, 1976-cı il təvəllüdlü Mehman Vazehi sərxoş halda, bıçaq xəsarəti almış vəziyyətdə 16-cı mikrorayon ərazisindəki kirayədə yaşadığı evə gəlib və orada ölüb.

Sumqayıt Şəhər Polis İdarəsi əməkdaşlarının keçirdikləri əməliyyat-axtarış tədbirləri nəticəsində M.Vazehini 5-ci mikrorayonda yaşayan tanışı Yelena Şıxəliyevanın bıçaqladığı müəyyənləşib.

O ifadəsində bildirib ki, əri Mehman evinə içkili vəziyyətdə gələrək onu döyməyə başlayıb. Nəticədə bu hadisə baş verib.

Y. Şıxəliyeva Azərbaycan Respublikası Cinayət Məcəlləsinin 120.1-ci (qəsdən adam öldürmə) maddəsi ilə ittiham olunub.

Fərid Əkbərov