Əsirlikdəki hərbçimizin anası BQXK-ə müraciət edəcək

Nailə Məmmədova oğlunun əsirlikdən qaytarılması üçün bu addımı atacaq

2009-cu il mayın 10-da Ermənistan Silahlı Qüvvələri tərəfindən əsir götürülən Azərbaycan ordusunun çavuşu Anar Hacıyevin anası oğlunun əsirlikdən geri qaytarılması xahişi ilə Beynəlxalq Qızıl Xaç Komitəsinin (BQXK) Azərbaycan nümayəndəliyinə müraciət edəcək.

Bu barədə APA-ya əsirin anası Nailə Məmmədova bildirib. Onun sözlərinə görə, BQXK əməkdaşları oğluna sonuncu dəfə fevralın 2-də baş çəkiblər: “O zamandan bəri oğlumdan xəbər yoxdur. Sonuncu dəfə BQXK-nın Bərdə ofisinin nümayəndələri məndən Anara çatdırmaq üçün ailə şəkillərini istəmişdilər. Mən də şəkilləri hazırladım. Amma sonra onlardan heç bir xəbər çıxmadı, heç şəkilləri də götürmədilər”.

Qeyd edək ki, 1990-cı il təvəllüdlü Anar Xanbaba oğlu Hacıyev Goranboy Rayon Hərbi Komissarlığından hərbi xidmətə çağırılıb. O, 2009-cu il mayın 10-da saat 09.45-də Ermənistan Silahlı Qüvvələri tərəfindən Füzuli istiqamətində əsir götürülüb.