Azərbaycanın məşhur plastik cərrahı 8 min manat cərimələndi

Bakı Apelyasiya Məhkəməsində iki nəfər pasientlə “Funda” Tibb Mərkəzinin həkimi, məşhur plastik cərrah Camal Əzimzadə arasında olan məhkəmə çəkişməsi başa çatıb. Bu barədə Lent.az-a həmin məhkəmədən məlumat verilib. Hakim Mirzə Tağızadə plastik cərrahdan tutulacaq pulun məbləğini artırıb.

Belə ki, Qasımova Gülarə Allahyar qızı və Qasımova Xatirə İsrafil qızı (onlar ana-baladır) maddi və mənəvi ziyanın ödənilməsi tələbilə Nərimanov rayon Məhkəməsinə müraciət edib. Məlum olub ki, C.Əzimzadə tərəfindən cərrahiyyə əməliyyatı olunan şəxslərin hər ikisi əməliyyatdan narazı qalıb. Onlar əməliyyat üçün ödədikləri pulu geri tələb etməklə yanaşı, ondan dəyən mənəvi ziyanı da istəyib. Belə ki, Qasımovalar əməliyyata çəkdikləri 5780 manat və əlavə olaraq dəyən mənəvi ziyan üçün 15 min manat tələb ediblər. Nərimanov rayon Məhkəməsi iddianı qismən – Qasımovalara ümumilikdə 1,5 min manat ödənilməsini təmin edib.

Onlar isə qətnamədən narazı qalaraq Bakı Apelyasiya Məhkəməsinə müraciət edib.

Bakı Apelyasiya Məhkəməsi Nərimanov rayon Məhkəməsinin qətnaməsini ləğv edərək, Gülnarə Qasımovanın xeyrinə yeni qətnamə çıxarıb. Qətnaməyə əsasən, cərrah Camal Əzimzadədən G.Qasımovanın xeyrinə 5780 manat maddi və 2000 manat (ümumilikdə 7780 manat) mənəvi ziyana pul tutulmalıdır.

Pərvin ABBASOV