Evləri sökülən Bakı sakinləri Prezident Administrasiyasında olublar

Bakıda “Qış bulvarı”nın tikiləcəyi ərazidəki evlərin sahibləri fevralın 18-də Prezident Administrasiyasının qəbul otağının qarşısına toplaşıblar.

Lent.az-ın müxbirinin verdiyi məlumata görə, həmin vətəndaşlar onlara kompensasiya verilməməsindən şikayətləniblər. Sakinlər bildiriblər ki, onlara şifahi olaraq hər kvadratmetrə görə 1500 ABŞ dolları təklif olunub. Lakin sakinlər bununla razılaşmadığını bildiriblər.

“Qış bulvarı”nın tikiləcəyi ərazidə evləri və obyektləri sökülən vətəndaşlardan ikisi sakin, ikisi sahibkar olmaqla 4 sakini Prezident Administrasiyasında qəbul ediblər. Qalan vətəndaşlar isə qəbul otağının qarşısında gözləyiblər.

Qəbul otağında narazı sakinləri qəbul edən Prezident Adminitrasiyasının əməkdaşları məsələdən xəbərsiz olduqlarını bildiriblər. Bu barədə jurnalistlərə açıqlamasında qəbul otağından çıxan Elmira adlı sakin məlumat verib: “Biz onlara dedik ki, “göydə Allahı, yerdə sizi deyib gəlmişik”. Onlar isə dedi ki, məsələni müzakirə edərək hara lazımdı çatdıracağıq”.

Qeyd edək ki, “Qış bulvarı”nın tikiləcəyi ərazi Füzuli, Topçubaşov və digər küçələri əhatə edir.

Pərvin ABBASOV