Elçin Behbudovun pulunu oğurlayanların apelyasiya məhkəməsi başladı

Lent.az-ın məlumatına görə, hakim Sahibxan Mirzəyevin sədrliyi ilə keçirilən iclasda təqsirli bilinənlər- Ruslan Məmmədov, Səxavət Mehdiyev, Elgiz Hüseynov, Zaur Əliyev və Fətəli Həsənovun apelyasiya şikayəti üzrə məhkəmə baxışı sentyabrın 3-nə təyin edilib.

Xatırladaq ki, Ağır Cinayətlərə Dair İşlər üzrə Məhkəmənin hökmü ilə Ruslan Məmmədov və Səxavət Mehdiyev 12 il, Elgiz Hüseynov və Zaur Əliyev 10 il, Fətəli Həsənov isə 8 il müddətinə azadlıqdan məhrum ediliblər.

İttihama görə, təqsirləndirilənlər Səxavət Mehdiyev, Ruslan Məmmədov, Elgiz Hüseynov, Zaur Əliyev və Fətəli Həsənov 2008-ci il yanvarın 29-da Heydər Əliyev prospekti - 98-də yerləşən MKTİK MMC şirkətində xəzinədar işləyən Rəşad Cəfərova məxsus “Mercedes-180” markalı avtomobildən 74 min manat oğurlayıblar. Dəstə həmçinin 2008-ci il mayın 27-də İnşaatçılar prospekti - 38-in qarşısında Çingiz Məmmədliyə məxsus “Hyundai Tucson” markalı avtomaşından 39 min manat, iyununda 7-ci mikrorayon Xarici dairəsi küçəsi - 116 ünvanında yerləşən meyvə şirələri satışı ilə məşğul olan firmanın xəzinədarı Mehman Sarıyevə məxsus “VAZ-2107” markalı maşından firmaya məxsus 69.000 dollar, həmin ilin aprelində İ.Səfərli küçəsi - 60 saylı evin qarşısında Səhman Quliyevə məxsus “Mercedes” markalı avtomobildən 58.100 dollar, həmin ilin iyulun 22-də S.S.Axundov küçəsi - 11/35 ünvanında yerləşən “Palma” kafesinin qarşısında Nəriman Həşimova məxsus “VAZ-2106” markalı maşından 47.450 dollar və 3 min manat, iyulun 14-də Ə. Hüseynzadə küçəsi 54 ünvanının qarşısında İşgəncələr Əleyhinə Qarşı Azərbaycan Komitəsinin sədri Elçin Behbudova məxsus olan “Tofaş” markalı avtomobildən 30 min manat və s. oğurlayıblar.

Adıçəkilən şəxslər Azərbaycan Respublikası Cinayət Məcəlləsinin 180.2.1-ci (soyğunçuluq qabaqcadan əlbir olan bir qrup şəxs tərəfindən törədildikdə), 180.2.2-ci (təkrar törədildikdə) və 180.2.5-ci (zərərçəkmiş şəxsə xeyli miqdarda ziyan vurmaqla törədildikdə) maddələri ilə ittiham olunublar.

Fərid Əkbərov