Masallıda trayler aşdı, minlərlə cücə tələf oldu

Dünən axşam saatlarında Ələt-Astara magistralının 160-cı km-də Masallı rayonun Təzə Alvadı kəndi ərazisindən keçən hissəsində yol qəzası baş verib. Lent.az-ın bölgə müxbirinin məlumatına görə, İran İslam Respublikasının vətəndaşı Pərviz Paki İlxısının idarə etdiyi “Badisan” markalı THR 86-958 nömrə nişanlı yol avtomobili idarəetməni itirərək, yolun sol tərəfinə aşıb. Hadisə nəticəsində sürücü xəsarət almasa da, avtomobilə ciddi ziyan dəyib.

Həmçinin hadisə zamanı avtomobildə olan 25 min ədəd xırda cücənin 10 mini ətrafa səpələnərək tələf olub. Qeyd edək ki, yük avtomobilində olan cücələr Salyan rayonundakı broyler fabrikinə məxsus imiş.

İlkin ehtimala görə, hadisə havanın yağmurlu və yolun sürüşkən olması nəticəsində baş verib.

Faktla bağlı Baş Dövlət Yol Polisi idarəsində araşdırmalar aparılır.

Pərvanə