Rail Rzayevin yaşadığı binanın mühafizəçisinə cəza istənilib

O, dələduzluqda və sənədlərin saxtalaşdırılmasında təqsirləndirilir

Yanvarın 29-da Yasamal rayon Məhkəməsində Azərbaycan Hərbi-Hava Qüvvələri və Hava Hücumundan Müdafiə Qoşunlarının sabiq komandanı, general-leytenant Rail Rzayev qətlə yetirilən gün yaşadığı binanın mühafizəçisi olmuş Elşən Eyvazovun cinayət işi üzrə məhkəmə prosesi keçirilib.

Lent.az-ın məlumatına görə, hakim Fuad Talışinskinin sədrliyi ilə keçirilən prosesdə dövlət ittihamçısı çıxış edib. Dövlət ittihamçısı məhkəmədən Elşən Eyvazovun 5 il müddətinə azadlıqdan məhrum edilməsini istəyib.

Proses müdafiə tərəfinin çıxışı ilə fevralın 3-də davam etdiriləcək.

İttihama görə, E.Eyvazov 2006-cı ilin mayında ailəsinə ünvanlı sosial yardım almaq üçüm sənədləri saxtalaşdırıb. Eyni zaman da onun avtomobilindən narkotik vasitə olan tiryək də aşkarlanıb.

E.Eyvazov Azərbaycan Respublikası Cinayət Məcəlləsinin 234.1-ci (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama), 178.2.4-ci (dələduzluq xeyli miqdarda ziyan vurmaqla törədildikdə) və 320.1-ci (Hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və ya bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) maddələri ilə ittiham olunur.

Qeyd edək ki, Elşən Eyvazov Rail Rzayevin yaşadığı binada mühafizəçi kimi çalışıb. 2009-cu il fevralın 11-də Rail Rzayev qətlə yetirilənə qədər E.Eyvazov növbədə olub. R.Rzayevin qətlindən sonra - fevralın 17-də Yasamal rayon Polis İdarəsinin əməkdaşları tərəfindən E. Eyvazov saxlanılıb və R.Rzayevin qətli ilə bağlı Baş Prokurorluğun Ağır Cinayətlərə Dair İşlər üzrə İstintaq İdarəsində dindirilib.

Xatırladaq ki, Azərbaycan Hərbi Hava Qüvvələri və Hava Hücumundan Müdafiə Qoşunlarının komandanı, general-leytenant Rail Rzayev 2009-cu il fevralın 11-də qətlə yetirilib. Cinayət işinin Baş Prokurorluq, Daxili İşlər və Milli Təhlükəsizlik nazirliklərinin əməkdaşlarından ibarət birgə əməliyyat-istintaq qrupu araşdırır.

Fərid Əkbərov