Azərbaycanda Çin vətəndaşını girov götürən dəstənin başçısı tutuldu

Çin Xalq Respublikasının (ÇXR) vətəndaşını Azərbaycanda girov götürməkdə təqsirləndirilən mütəşəkkil cinayətkar dəstənin başçısı həbs edilib.

Bu barədə APA-ya Daxili İşlər Nazirliyinin mətbuat xidmətindən məlumat verilib.

Məlumatda bildirilir ki, DİN-in Baş Mütəşəkkil Cinayətkarlıqla Mübarizə İdarəsi əməkdaşlarının həyata keçirdiyi əməliyyat-axtarış tədbirləri nəticəsində Çin Xalq Respublikasının vətəndaşı Zhanq Venlini girov götürməkdə təqsirləndirilən mütəşəkkil cinayətkar dəstənin başçısı Ye Qhanq Bin tutularaq istintaqa təhvil verilib.

Xatırladaq ki, məlum cinayət hadisəsi 2010-cu il yanvarın 6-da baş verib. Qaradağ rayonu, Lökbatan qəsəbəsində kirayədə yaşayan, ÇXR vətəndaşı, xanım Zhanq Yaogin DİN-in Baş Mütəşəkkil Cinayətkarlıqla Mübarizə İdarəsinə müraciət edərək, həmin gün saat 02:00 radələrində həyat yoldaşı Zhanq Venlinin Bakının 8-ci km qəsəbəsində özünə məxsus “Opel Astra” markalı avtomaşını ilə birlikdə naməlum şəxslər tərəfindən oğurlanması və azadlığa buraxılması müqabilində 300 min ABŞ dolları tələb olunması barədə məlumat verib.

Dərhal Daxili İşlər və Milli Təhlükəsizlik nazirliklərinin əməkdaşlarından ibarət əməliyyat-axtarış qrupu yaradılıb. Müəyyən olunub ki, Zhanq Venlin yanvarın 5-də axşam həyat yoldaşı ilə birlikdə Nizami rayonun 8-ci km qəsəbəsində yaşayan həmyerlisi Li Vinin evinə qonaq gedib. Təxminən saat 02:00 radələrində o, həyətə çıxıb və geri qayıtmayıb. Ertəsi gün saat 9:30 radələrində Zhanq Venlinə məxsus mobil telefonundan onun həyat yoldaşına zəng vuran naməlum şəxslər onun Çin vətəndaşları tərəfindən oğurlandığı bildirilib və azadlığa buraxılması müqabilində 300 min ABŞ dolları tələb ediblər. Naməlum şəxslər bununla bağlı polisə xəbər veriləcəyi və pulun ödənilməyəcəyi təqdirdə Zhanq Venlini öldürəcəklərini deyiblər.

Yanvarın 7-də girov götürülmüş Çin vətəndaşının həyat yoldaşının mobil telefonuna yenidən zəng vuran naməlum şəxslər Zhanq Venlinin kəsilmiş barmağının yaşadığı evin həyətinə atıldığını bildiriblər. Zərərçəkənin kəsilmiş şəhadət barmağı yaşadığı evin həyətindən aşkar edilərək götürülüb.

Elə həmin gün həyata keçirilmiş əməliyyat-axtarış tədbirləri nəticəsində cinayəti törətməkdə şübhəli bilinən ÇXR vətəndaşları Li Jien Vei, Zenqo Vanq Liyonq, Vanq Konqyonq və Zinq Laxu saxlanılıblar. Onların yaşadıqları evə baxış zamanı cinayətdə istifadə olunan maskalar, bıçaqlar, balta, dəmir dəyənəklər, yapışqanlı lent, mobil telefonlar və s. əşyalar aşkar edilərək götürülüb. Gözləri yapışqanlı lentlə sarılmış, sağ əlinin barmağı kəsilmiş vəziyyətdə olan Zhanq Venlin isə girovluqdan azad edilib.

Faktla bağlı DİN-nin Baş Mütəşəkkil Cinayətkarlıqla Mübarizə İdarəsi tərəfindən Azərbaycan Respublikası Cinayət Məcəlləsinin 144.1 (adam oğurluğu) maddəsi ilə cinayət işi başlanıb, zəruri istintaq tədbirləri davam etdirilir.