Mərdəkan yolunda ağır qəza: 1 ölü, 1 yaralı

Marşrut avtobusu “VAZ-2109”-la toqquşdu

Ötən gecə Bakının Əzizbəyov rayonu ərazisində ağır yol qəzası baş verib. Əzizbəyov dairəsi - Heydər Əliyev Beynəlxalq hava Limanı yolunda 24 saylı marşrut üzrə hərəkət edən “MAN” markalı iritutumlu avtobus “VAZ 2109” markalı minik avtomobili ilə toqquşub. ANS PRESS-in məlumatına görə, minik avtomobili arxadan gələn maşınları gözləmədən əks istiqamətdə manevr edib. Arxadan gələn avtobus isə “VAZ 2109”-u ortadan vurub.

Qəza nəticəsində iki nəfər dünyasını dəyişib. Onlardan birinin adının Elnur olduğu bildirilsə də, şəxsiyyəti hələlik tam dəqiqləşdirilməyib. Sərnişin oturacağında oturan Elnur zərbənin gücündən maşından yerə düşüb, avtobus isə onun üstündən keçib. Minik avtomobilinin sürücüsü, 26 yaşlı Dadaşov Hüseyn Fərhad oğlu isə hadisə şahidləri tərəfindən 3 saylı şəhər klinik xəstəxanasına aparılarkən yolda dünyasını dəyişib. Avtobusdakı sərnişinlər arasında xəsarət alan olmayıb.

Faktı Əzizbəyov Rayon Polis İdarəsinin istintaq şöbəsinin və rayon Dövlət Yol Polisi İdarəsinin əməkdaşları araşdırırlar. Müstəntiq Firdovsi Əsədli ANS PRESS-ə bildirib ki, hadisənin dəqiq səbəbi aparılan araşdırmaların yekununda məlum olacaq.