“VAZ 2103” traktorla toqquşdu: 1 ölü, 1 yaralı

Hadisə Quba rayonu ərazisində baş verib
Yanvarın 10-da Quba rayonunda ölümlə nəticələnən yol qəzası baş verib. ANS PRESS-in bölgə müxbirinin məlumatına görə, hadisə saat 18:00 radələrində Quba rayonu Alekseyevka kəndi ərazisində qeydə alınıb.

Quba rayon polis bölməsinin müstəntiqi Əhməd Nəcəfovun ANS PRESS-ə verdiyi məlumata görə, Qubadan Xaçmaza gedən “VAZ 2103” markalı maşın “ENZ-80” markalı traktorla toqquşub.

Traktoru Xaçmaz sakini, 49 yaşlı Əmirzadə Əmirbaba oğlu Paşayev, “Jiquli”ni isə Köhnə Xaçmaz kənd sakini Gülağa Rəhmanov idarə edib.

Qəza nəticəsində Gülağa Rəhmanov və onun qardaşı Sayəddin Rəhmanov ağır yaralanıblar. Onlar təcili xəstəxanaya çatdırılsa da, “Jiquli”ni idarə edən Gülağa Rəhmanovu xilas etmək mümkün olmayıb.

Sayəddin Rəhmanov isə hazırda travmatik şokdadır.

Faktla bağlı AR Cinayət Məcəlləsinin 263.2 maddəsi ilə cinayət işi açılıb, araşdırma aparılır.