Gəncədə avtomobil oğrusu tutulub

Oğurluq faktı ilə bağlı araşdırma aparılır

Gəncə şəhər Kəpəz rayon Polis şöbəsi ilə Gəncə Dövlət Yol Polisinin əməkdaşları avtomobil oğrusunu yaxalayıb. Bu barədə Lent.az-ın Gəncəbasar müxbirinə Gəncə şəhər Polis İdarəsindən məlumat verilib. Məlumata görə, 1964-cü il təvəllüdlü Gəncə sakini Əliyev Eldar Şubay oğlu Kəpəz rayon Polis şöbəsinə müraciət edərək “Niva” markalı, 90 BK 177 dövlət nömrə nişanlı avtomobilinin Ordubadi küçəsində yerləşən evinin qarşısından naməlum şəxs tərəfindən qaçırıldığını bildirib.

Kəpəz rayon Polis şöbəsi ilə Gəncə Dövlət Yol Polisinin əməkdaşlarının axtarış tədbirləri ilə avtomobil Heydər Əliyev prospekti ilə Atatürk prospektinin kəsişməsində hərəkət halında saxlanılıb. Avtomobili qaçırmaqda təqsirləndirilən 1982-ci il təvəllüdlü Gəncə sakini Mamırov Emin Qalib oğlu da tutulub.

Faktla bağlı araşdırma aparılır.

Vüsalə Cənnətova