“Mətanət A” şirkətinin külli miqdarda pulu mənimsənilib

Ağır Cinayətlərə Dair İşlər üzrə Məhkəmədə “Mətanət A” şirkətinin külli miqdarda pulunu mənimsəməkdə ittiham olunan şəxsin cinayət işi üzrə məhkəmə prosesi keçirilib.

Lent.az-ın məlumatına görə, hakim İlham Mahmudovun sədrliyi ilə keçirilən prosesdə şirkətin əməkdaşı Hafiz Səlimov elan olunmuş ittiham üzrə özünü təqsirli bilməyib. O bildirib ki, şirkətə məxsus heç bir pulu mənimsəməyib. H.Səlimov topdansatış məntəqələrinə paylanan sementlərin pullarının hamısını şirkətin xəzinəsinə təhvil verdiyini söyləyib.

Proses şahid ifadələri ilə yanvarın 18-də davam etdiriləcək.

İttihama görə, H. Səlimov "Mətanət A" şirkətində sement məhsullarının topdan satış məntəqələrinə paylanmasını təşkil edib. O, mağazalarda sement satışından toplanan külli miqdarda pulu mənimsəyib. Şirkətdə aparılan yoxlamalardan sonra H. Səlimov tutulub.
Qeyd edək ki, təqsirləndirilən şəxs Azərbaycan Respublikası Cinayət Məcəlləsinin 179.3.2-ci (mənimsəmə və israf etmə külli miqdarda törədildikdə) maddəsi ilə ittiham olunur.
Fərid Əkbərov