Yalançı “MTN”çilərin məhkəməsi başladı

Yanvarın 5-də Ağır Cinayətlərə Dair işlər üzrə Məhkəmədə özlərini Milli Təhlükəsizlik Nazirliyinin əməkdaşı kimi təqdim edən şəxslərin cinayət işi üzrə məhkəmə prosesi keçirilib.

Lent.az-ın məlumatına görə, hakim İradə Həsənzadənin sədrliyi ilə keçirilən prosesdə dövlət ittihamçısı ittiham aktını elan edib.
İttihama görə, təqsirləndirilən şəxslər - Səidə Salayeva və Tahir Məmmədov Bakı şəhər sakini Vaqif Qasımovu Milli Təhlükəsizlik Nazirliyinə işə düzəldəcəklərini vəd edərək, ondan 10 min ABŞ dolları alaraq həmin pulu mənimsəyiblər. Bundan başqa, təqsirləndirilən şəxslər Almaz Hüseynliyə məxsus Bakı şəhəri, Səbail rayonu A.İsmayılov küçəsi 35 B ünvanında iki otaqlı fərdi yaşayış evini sataraq, pulunu götürüblər.
S. Salayeva və T. Məmmədov daha 8 nəfərin adına müxtəlif banklardan kredit götürərək, mənimsəyiblər.
Prosesdə ifadə verən təqsirləndirilən şəxslər elan onlara qarşı irəli sürülən ittihamla özlərini təqsirli bilməyiblər.

Qeyd edək ki, təqsirləndirilən şəxslər Azərbaycan Respublikası Cinayət Məcəlləsinin 178.2.1-ci (dələduzluq qabaqcadan əlbir olan bir qrup şəxs tərəfindən törədildikdə) , 178.3.2-ci (külli miqdarda ziyan vurmaqla törədildikdə) və 310-cu (vəzifəli şəxsin səlahiyyətlərini mənimsəmə) maddələri ilə ittiham olunurlar.

Fərid Əkbərov

.