Dövlət Komissiyası Beynəlxalq Qızıl Xaç Komitəsinə müraciət edəcək

Azərbaycanın Əsir və itkin düşmüş, girov götürülmüş vətəndaşlarla əlaqədar Dövlət Komissiyası Tovuz rayon sakini Tağıyev Eldar Heydər oğlu ilə bağlı bu gün Beynəlxalq Qızıl Xaç Komitəsinə müraciət edəcək.

Bu barədə APA-ya komissiyanın katibi Şahin Sayılov bildirib.

Qeyd edək ki, ermənilərin atəşkəs rejimini pozması nəticəsində Tovuz rayon Tağıyev Eldar Heydər oğlunun həlak olduğu barədə məlumat yayılıb. Məlumatlara görə, ermənilər dekabrın 28-i saat 18.00 radələrində Tovuz rayonunun Əlibəyli kəndi istiqamətində təmas xəttinin yaxınlığında kənd sakini, 1964-cü il təvəllüdlü Tağıyev Eldar Heydər oğlunu atəşə tutublar.

Əlibəyli kənd sakinlərinin APA-nın Qərb bürosuna verdikləri məlumata görə, E. Tağıyev aldığı güllə yarasından yerindəcə keçinib.

İlkin məlumata görə, o, Əlibəyli kəndi ilə Ermənistan Respublikasının Berd rayonunun Aygezor kəndi arasında yerləşən təmas xəttinə yaxın ərazidən keçən Tovuz çayında balıq tutarkən erməni gülləsinə tuş gəlib. Sakinlərin bildirdiyinə görə, onun meyiti bir müddət təmas xəttində qalıb, sonradan ermənilər tərəfindən aparılıb.

Digər məlumatlara görə isə E. Tağıyev ermənilər tərəfindən girov götürülüb.