Elçibəyin vəfatı günü mühafizəçisi də dünyasını dəyişdi

Lent.az-ın məlumatına görə, Məzahir Bağırov 1962-ci ildə Gədəbəy rayonunda anadan olub. 1989-cu ildə milli-azadlıq hərəkatına qoşulub. O, Qarabağ uğrunda gedən döyüşlərdə könüllü olaraq iştirak edib. Əbülfəz Elçibəyin hakimiyyəti dövründə Milli Qvardiyanın quruculuğundan xüsusi fəaliyyət göstərib və bu qurumun komandanının müavini vəzifəsində çalışıb.

M. Bağırov Əbülfəz Elçibəy Kələkidən Bakıya döndükdən sonra bir müddət onun mühafizəçisi kimi fəaliyyət göstərib. 2003-cü ildə Moskvaya, oradan isə Kiyevə köçüb.

Bir neçə gün öncə Gədəbəyə ailəsinə baş çəkməyə gedən M. Bağırovun avqustun 22-də, Əbülfəz Elçibəyin ölüm günündə səhhəti qəflətən pisləşib. Bakıya xəstəxanaya gətirilərkən yolda keçinib.