Çörəyi bu yerdə saxlamaq olmaz: yeganə düzgün ÜSUL

Mütəxəssislərin sözlərinə görə, əgər çörəyi bir neçə gün ərzində yeyəcəksinizsə, onu mətbəx masasının üzərində, otaq temperaturunda saxlamaq daha məqsədəuyğundur. Soyuducu süd, pendir və hazır yeməklərin saxlanması üçün nəzərdə tutulsa da, çörək üçün uyğun yer hesab edilmir.

Lent.az xəbər verir ki, soyuducu kifin yaranmasını ləngidə bilər, lakin çörəyin daha tez bayatlaşmasına və dadını itirməsinə səbəb olur.

Sıfır dərəcədən aşağı temperaturlar çörəyin otaq temperaturunda saxlanıldığı halla müqayisədə üç dəfə daha tez quruyub bərkiməsinə gətirib çıxarır.

Çörəyi necə saxlamaq lazımdır?

Çörəyin düzgün saxlanma üsulu onun növündən və nə vaxt istifadə olunacağından asılıdır.

Əl işi, xırtıldayan qabıqlı çörəkləri otaq temperaturunda, kağız torbada saxlamaq tövsiyə olunur. Bu, hava dövranını təmin edərək qabığın xırtıldayan qalmasına kömək edir. Plastik torbalardan istifadə etmək isə məsləhət görülmür, çünki onlar nəm toplayaraq qabığın yumşalmasına səbəb olur.

Mütəxəssislər bildirirlər ki, çörək bir neçə gün ərzində yeyiləcəksə, onu mətbəx masasının üzərində saxlamaq lazımdır. Çörəyi kəsdikdən sonra isə kəsilmiş hissəsini aşağı çevrilmiş vəziyyətdə kəsmə taxtasının üzərinə qoymaq məsləhətdir. Bu üsul iç hissənin qurumasının qarşısını alır. Daha sonra çörəyi qorumaq üçün üzərini kağız torba ilə örtmək olar.

Çörəyi otaq temperaturunda, günəş şüalarından və istilik mənbələrindən uzaq yerdə saxlamaq tövsiyə edilir.

Uzun müddət saxlamaq istəyirsinizsə...

Bir neçə gün ərzində istifadə edilməyəcək çörəyi dondurmaq daha yaxşı seçimdir. Mütəxəssislər bildirirlər ki, soyuducuda saxlamaq əvəzinə dondurucuya qoymaq bayatlama prosesini demək olar ki, tamamilə dayandırır. Bu üsul həm bütöv çörəklər, həm də yarım tikələr üçün uyğundur. Xüsusilə dilimlənmiş çörəklər dondurucudan çıxarıldıqdan sonra birbaşa tost hazırlamaq üçün əlverişlidir.

Çörəyi dondurarkən onu kip bağlanan paketə yerləşdirmək və içəridəki havanı mümkün qədər çıxarmaq lazımdır.

Lakin çörəyi əridərkən əvvəlcə onu paketdən çıxarmaq vacibdir. Əks halda yaranan kondensasiya çörəyin nəmlənməsinə səbəb ola bilər. Daha sonra çörəyi otaq temperaturunda tam əriməyə qoymaq lazımdır. Qabığının və iç hissəsinin təzə bişmiş çörək kimi olması üçün isə onu qısa müddət sobada qızdırmaq kifayətdir.