Müxalifət inqilab anonsu verdi, Oktyabr Sarayı tutuldu HADİSƏ YERİNDƏN

Kiyevdə kütləvi aksiya keçirən müxalifət ötən gecə şəhərin mərkəzindəki Oktyabr Sarayını tutublar. Birləşmiş Ukrayna Azərbaycanlıları Konqresinin (BUAK) sədri Rövşən Tağıyevin Lent.az-a verdiyi məlumata görə, sarayı rəhbərlik aksiyaçılara könüllü təslim edib.

Tağıyevin dediyinə görə, ötən gecə şəhərin Kreşatnik küçəsində, “Maydan”da, Ali Rada qarşısında və Hökumət binası ilə üzbəüz Marinski Park ətrafında davam edən etiraz aksiyasında müxalifət liderlərindən UDAR partiyasının sədri Vitali Kliçko, “Batkivşina” fraksiyasının lideri Arseni Yasenyuk və digərləri çıxış ediblər. Onlar Ali Radaya hökumətin istefası tələbi ilə yanaşı prezident Viktor Yanukoviçin istefa tələbini də rəsmən elan ediblər: “Liderlər belə davam etdiyi təqdirdə, ölkədə inqilabın qaçılmaz olduğunu bildirdilər”.

R. Tağıyevin dediyinə görə, gecə polislə jurnalistlər arasında ciddi qarşıdurma olub və bir neçə jurnalist, o cümlədən “Novıy Kanal” ın əməkdaşları ağır formada döyülüblər.

Məlumata görə, ötən gecə Kiyevdəki ABŞ, Fransa və Almaniya səfirləri baş nazir Nikolay Azarov ilə görüşüblər. Görüşün əsas mövzusu bundan sonra etirazçılara güc tətbiq edilməməsi ilə bağlı olub.