Misirin yeni prezidenti Əbdülfəttah əs-Sisi Qahirə xəstəxanasına gedərək, prezident andiçməsi mərasimində bir qrup tərəfindən cinsi təcavüzə məruz qalan qadına baş çəkib.
Lent.az-ın “nyusru”-ya istinadən məlumatına görə, o, qadına bir dəstə gül verərək, ondan üzr istəyib.
“Mən sizdən və bütün misirli xanımlardan üzr istəməyə gəlmişəm. Ruhdan düşməyin”-deyə, o, zorlanmaya məruz qalan qadına deyib.
Mənbə xatırladıb ki, 42 yaşlı qadın Təhrir meydanına 6 yaşlı oğlu ilə gedibmiş. Əs-Sisinin prezidentliyini bayram edən bir qrup kişi onu əhatəyə alaraq, paltarının cırıb, əynindən çıxarıb, orada zorlayıblar.
Hadisə yerinə polis gələrək, qadını xəstəxanaya yerləşdirib. Cinayətin görüntüləri İnternetdə yayılıb.
Baş verənlərdən ölkə ictimaiyyəti hiddətlənsə də, belə olayları Misir üçün adi hala çevrildiyini bildiriblər.
Əs-Sisinin andiçmə mərasimində 27 seksual qısnam iddiası ilə polisə şikayət ərizəsi daxil olub.
Mənbə bildirib ki, polis bu məsələ ilə bağlı 15-49 yaş arasında olan 7 kişini artıq həbs edib.
Ölkənin hüquq müdafiəçiləri və feministləri prezidentin xəstəxanaya zərərçəkən qadına baş çəkməsini alqışlayaraq, dövlət başçısının məsələ ilə bağlı bəyanatının həyata keçəcəyinə ümidvar olduqlarını vurğulayıblar.