Daha bir nəfər Rusiya prezidentliyinə namizəd oldu

Rusiya Kommunistləri Partiyasının prezident seçkilərində namizədi məlum olub.

APA-nın TASS agentliyinə istinadən verdiyi məlumata görə, Rusiya Kommunistləri Partiyasının bu gün keçirilən qurultayının yekunlarına əsasən partiyanın lideri Maksim Suraykin 2018-ci ildə Rusiyada keçiriləcək prezident seçkilərində partiyanın namizədi olub.

M. Suraykin qurultayda səsvermə başa çatandan dərhal sonra sənədlərini Rusiya Mərkəzi Seçki Komitəsinə təqdim etməyə yollanıb. Parlamentdə təmsil olunmayan partiya kimi Rusiya Kommunistləri Partiyası namizədlərinin qeydiyyata alınması üçün ən azı 100 min imza toplamalıdır.

Qeyd edək ki, Rusiyada prezident seçkiləri gələn il martın 18-də keçiriləcək. Bazar ertəsindən rəsmən seçki kampaniyası başlayıb. Partiyaların namizədlərini irəli sürməsi üçün 25 gün, şəxslərin özlərinin namizədliyini irəli sürməsi üçün 20 gün nəzərdə tutulur. İndiyə qədər M. Suraykinlə bərabər Rusiyanın hazırkı prezidenti Vladimir Putin, Liberal Demokrat Partiyasının sədri Vladimir Jirinovski, Lenin adına sovxozun direktoru Pavel Qrudinin, teleaparıcı Kseniya Sobçak, "Yabloko" partiyasının lideri Qriqoriy Yavlinskiy, İnkişaf Partiyasının sədri Boris Titov, politoloq, Sosial Texnologiyalar Mərkəzinin rəhbəri Andrey Boqdanov, "Qadın Dialoqu" Partiyasının sədri Yelena Semerikova, biznesmen Sergey Polonskiy, müğənni və hüquq müdafiəçisi Yekaterina Qordon seçkilərdə iştirak etmək niyyətlərini açıqlayıblar.