Azərbaycanlı qadından Qazaxıstanda inanılmaz dələduzluq

Qazaxıstanda Azərbaycan vətəndaşı Mələk Naimbəyovanın dələduzluğu hər kəsi təəccübləndirib.

Lent.az-ın Rusiya mətbuatına istinadən verdiyi məlumata görə, özünü Karaqanda vilayətinin Maliyyə Polisi Departamentində şöbə rəisi, kapitan kimi təqdim edən Mələk Naimbəyova yerli kafelərdən birinin sahibəsindən 50 min təngə alarkən saxlanılıb.

İstintaq müəyyən edib ki, Mələk Naimbəyova 2013-cü ilin aprelində kafe sahibəsinə onu 1 milyon 600 min təngə müqabilində Maliyyə Polisi Departamentində şöbə rəisinin müavini vəzifəsinə təyin etdirəcəyini vəd edib. Mələk Naimbəyova maliyyə polisi formasında və üzərində saxta vəsiqə olub. Aprelin ortalarına kafe sahibəsindən 1 milyon 600 min təngə alan Mələk Naimbəyova daha sonra xidməti formanın alınması üçün ondan 50 min təngə istəyib. Kafedə cinayət başında saxlanılan Mələk Naimbəyova haqqında cinayət işi açılıb.