Patriarx Kirill “KQB” agenti olub - İDDİA

İsveçrənin "Sonntagszeitung" qəzeti İsveçrə federal polisinin məxfilikdən çıxarılan sənədlərinə, müsahibələrə və nəşrlərə istinadən yazır ki, Patriarx Kirill (Vladimir Qundyaev) 1970-ci illərdə Cenevrədə Ümumdünya Kilsələr Şurasında işləyərkən guya “Mixaylov” təxəllüsü ilə “KQB” agenti olub.

Lent.az-ın xarici mediaya istinadla xəbərinə görə, jurnalistlər iddia edirlər ki, o, Şura üzvləri haqqında məlumat toplamalı və onların SSRİ-yə münasibətinə təsir etməli idi.
Rus Pravoslav Kilsəsi qəzetin məqaləsinə cavab verib. Moskva patriarxlığının cəmiyyət və media ilə kilsə əlaqələri üzrə sinodal şöbəsinin sədr müavini Vaxtanq Kipşidze materialı “siyasi motivli spekulyasiya” adlandırıb.

“Təəssüf ki, bu məqsəd son vaxtlar müasir Qərb mediasında üstünlük təşkil edir. Üstəlik, hər bir fərziyyədən sonra məqalə müəllifi utanaraq əlavə edir ki, bu yalanı təsdiqləmək mümkün deyil”, - Kipşidze vurğulayıb.

Qəribədir ki, İsveçrə nəşrinin iddia edilən “Patriarxın KQB ilə əlaqələri” ilə bağlı həmsöhbətinin özü də bu strukturla ən birbaşa əlaqəsi olan şəxs olub”, - Kipşidze yekunlaşdırıb.

Əlavə edək ki, 1971-ci ildə Vladimir Qundyaev arximandrit rütbəsinə yüksəlib və Cenevrədəki Ümumdünya Kilsələr Şurasında Moskva patriarxlığının nümayəndəsi təyin edilib.