Bakıdan "cəhənnəm"ə zəng, ağ donların qara günləri, "biz məhv olduq" - EKSKLÜZİV

“Bağlamışam. İşləmir daha salon. İşlədə bilmərəm. Başqa çarəm də yoxdu. Ya bağlamalıyam, ya da ölməli...”

Nəsib deyir bu sözləri. Nəsib Tailor. Əfqanıstanlı, kabilli Nəsib. Bu günlərdə ölkəsində baş verənlər onun da dinc həyatını alt-üst edib. İndi işsizdi. Səbəb isə...

Hə, səbəb isə “Taliban”dı. Əfqanıstanda hakimiyyəti ələ keçirən və özüylə yeni qaydalar gətirən bu radikal qrup.
Gəlinlik paltarı satılan mağazası vardı Nəsibin. Bir-birindən gözəl, bəyaz rəngi bu əlbisələr, çoxlarının xoşbəxt gününün xatirəsini daşıyırdı özündə. Elə Nəsib üçündə xatirə dolu bir məkan idi. Ailəsinə bir parça çörəyi də buranın sayəsində aparırdı. Amma artıq işlətmir buranı. Elə özünün də dediyi kimi gəlinlik salonunu bağlamağa məcbur qalıb:

“Eh, tək mən deyiləm ki. Mənim kimi nə qədər insan indi işsizdir. Bütün qadın geyimi satılan yerləri bağladılar. Necə deyərlər, bazarımız öldü. “Taliban” gəldi və hər şey yenidən təkrarlanır.Cəhənnəmə düşdük sanki. Məhv olduq biz”.

Zaman, 2014-cü ilin aprel ayı.

Məkan, Əfqanıstan, Kabil.

Hə, 2014-cü ilin aprelində Əfqanıstana ezam olunan Lent.az-ın əməkdaşı Səbuhi Məmmədli Kabilin mərkəzi küçələrindən birində çəkmişdi bu fotonu. Elə oradan yazdığı reportajlardan birində də bu foto yayımlanmışdı. Fotonun üzərinə diqqətlə baxsanız telefon nömrə görəcəksiniz - 0797691057. 7 ildə bu nömrə də dəyişməyib. Əlaqə saxlamaq üçün zəng etdik və Nəsib özü cavab verdi bizə. Səsindəki məyusluğu isə təsəvvür edə bilməzsiniz...