İtaliyada mafiya reallığı

İtaliyanın Neapol şəhərində günün günorta çağı baş verən mafiya hesablaşması görənləri dəhşətə gətirib.

Lent.az-ın verdiyi məlumata görə, İtaliya polisi bu ilin mayında baş verən hadisə zamanı qətl törədən şəxsin kimliyini müəyyənləşdirərək tapa bilməyib və ona görə də bu günlərdə olayla bağlı görüntüləri televiziyalara təqdim edib. Məqsəd qatilin şəxsiyyətini müəyyənləşdirmək və onu tutmaqdır.

Həmin görüntülər hazırda dünyanın əksər telekanallarında yayımlanmağa başlayıb. Görüntü küçədəki videokameralar tərəfindən qeydə alınıb. Bir nəfər naməlum şəxs bardan bir şəxsi çıxarır, yerə uzadaraq əlindəki tapançadan başına 3 dəfə atəş açır. Sonra da heç nə olmamış kimi soyuqqanlı şəkildə dönərək gedir.

Öldürülən şəxs 53 yaşlı Mariano Baciodur. İddialara görə, Mariano Bacionun iki rəqib mafiyadan birinin bölgədə narkotik satan nümayəndəsiylə əlaqəsi varmış.

İtaliya mafiyaları ilə bağlı araşdırmaların müəllifi olan Roberto Saviano deyib ki, baş verən bu olay İtaliyanın bəzi bölgələrində insan həyatının nə dərəcədə ucuz və təhlükədə olduğunu çılpaqlığıyla ortaya qoyur.