Şimali Koreya MAQATE-yə şərt qoydu

Şimali Koreya rəsmilərinin Beynəlxalq Atom Enerjisi Agentliyi (MAQATE) müfəttişlərinin ölkədəki nüvə obyektlərinə geri dönmələri üçün bəzi şərtlər irəli sürdüyü açıqlanıb. Lent.az-ın “trt.net.tr” saytının Azərbaycan versiyasına istinadən verdiyi məlumata görə, Pxenyan nüvə bombası istehsalı üçün platon istehsal edə bilən 12 min yanacaq çubuğu ehtiyatını adını açıqlamadığı üçüncü ölkəyə bazar dəyərindən 5 dəfə artıq qiymətə satmaq istəyir.

İkinci şərt olaraq Pxenyan qurum müfəttişlərinin Yonqbyondakı nüvə obyektini iyarət etmələrini istəyir. Diplomatik mənbələrə görə, Şimali Koreya hakimiyyəti bununla nüvə obyektinin dinc məqsədli olduğunu müfəttişlərə təsdiqlətmək istəyir.

Qeyd edək ki, Şimali Koreya 2009-cu ildə ölkədəki nüvə obyektlərində bütün izləmə vasitələrinin çıxarılmasını və müfəttişlərin ölkəni tərk etməsini tələb edib.