Mahaçqalada qanlı döyüşlər gedir

Sentyabrın 24-də saat 23:30 radələrində Dağıstanda terrorçu-kamikaze milis əməkdaşlarına hücum edib. Lent.az-ın “RİA Novosti” agentliyinə istinadən verdiyi məlumata görə, həmin vaxt milis əməkdaşları Mahaçqalada silahlılar olan evi mühasirəyə alıblarmış.

Terrorçu-kamikadzenin özünü partlatması nəticəsində 26 nəfər yaralanıb. Yaralıların 20 nəfəri milis əməkdaşı, qalanları mülki şəxsdir. Bir neçə saat sonra yayılan məlumatda isə bildirilir ki, xüsusi təyinatlı milis dəstəsinin 2 əməkdaşı və 2 silahlı ölüb, 1 silahlı saxlanılıb. Mahaçqalanın bu rayonunda fövqəladə vəziyyət elan olunub. Silahlıların mühasirəyə alındığı evin ətrafında gecə əməliyyat dayandırılıb. Səhər saatlarında əməliyyat yenidən başlayıb.

Bu gecə yarısı da silahlılar Mahaçqalada milis əməkdaşlarına hücum ediblər. Milis əməkdaşlarını aparan avtobus hədəfə götürülüb. Bu dəfə qurbansız ötüşmək mümkün olub.

Bu arada səhər saatlarında Kabardin-Balkarda da terrorçu-kamikazenin özünü partlatması xəbəri gəlib. Terrorçu-kamikaze özünü Nartkala şəhərində Federal Təhlükəsizlik Xidmətinin binası qarşısında partladıb. Hüquq-mühafizə orqanlarının əməkdaşları arasında xəsarət alan yoxdur. Terrorçu-kamikadzenin də şəxsiyyəti dəqiqləşdirilib. Bu, axtarışda olan Nartkal şəhər sakini Oleq Nizovdur.