“Karl” 22 nəfəri öldürüb, 20 nəfəri itkin salıb

Leysan yağış və güclü küləklə müşahidə olunan “Karl” qasırğası Meksikanın şərqində yerləşən Verakrus ştatında 22 nəfərin ölümünə, 20 nəfərin itkin düşməsinə yol açıb. Lent.az-ın “CNN”ə istinadən verdiyi məlumata görə, həftə ərzində ştat ərazisinə 215 millimetr yağış düşüb.

Qasırğa yüzlərlə ağacı qırıb, elektrik dirəklərini aşırıb. Fəlakət zonasından 150 min insan köçürülüb. Ümumiyyətlə, “Karl” qasırğasından 500 minə qədər insan əziyyət çəkib. Bu insanlar bir neçə gündür ki, elektrik enerjisindən mərhumdurlar.

Bu arada Meksikanı növbəti qasırğanın vuracağı xəbəri gəlib. Sakit okeanda, Meksikanın Cənubi Kaliforniya ştatı sahillərində formalaşan “Corcet” qasırğası hazırda Kabo-San-Lukas şəhərindən 100 kilometr cənub-şərqdədir və şimal-qərb istiqamətində saatda 15 kilometr sürətlə hərəkət edir. Cənubi Kaliforniya ştatında əhaliyə qasırğa təhlükəsi ilə bağlı xəbərdarlıq edilib.