Türklərin 55 faizi Ermənistanla sərhədlərin açılmasını istəmir

Türkiyə vətəndaşlarının 55 faizi 10 oktyabr 2009-cu ildə Sürixdə Türkiyə və Ermənistan arasında imzalanmış protokolların ratifikasiya edilməsinin və Ermənistanla sərhədlərin açılmasının əleyhinədirlər. Lent.az-ın Türkiyə mətbuatına istinadən verdiyi məlumata görə, bunu ABŞ-ın Marşal Fondunun Türkiyədə keçirdiyi sorğunun nəticələri göstərib.

Marşal Fondu sorğunu bu ilin iyununda keçirsə də, nəticələri indi açıqlayıb. Türklərin 27 faizi Ermənistanla münasibətlərin bərpasına tərəfdar çıxıb.

Sorğuya qatılan türklərin əksəriyyəti Avropa Birliyindən daha çox Yaxın Şərq ölkələri ilə münasibətlərin möhkəmləndirilməsini istəyirlər. Əgər 13 faiz Avropa Birliyinə inteqrasiyanın tərəfdarıdırsa, 20 faiz Yaxın Şərq ölkələri ilə münasibətlərin inkişafını üstün tutur.

Sorğu onu da göstərib ki, türklər artıq ABŞ-ı sevmirlər. Əgər keçən il türk respondentlərin 50 faizi ABŞ-la müttəfiqliyi dəstəkləyirdisə, indi bu göstərici 28 faizə düşüb.