İsrail Colan yüksəkliklərini Suriyaya qaytarmaq istəyir

İsrail və Suriya bu il sülh müqaviləsinə imza ata bilər. Lent.az-ın verdiyi məlumata görə, bu barədə Küveytin “Əl-Carida” qəzeti məlumat yayıb.

Bunun üçün İsrail Suriyaya işğal etdiyi Colan yüksəkliklərini qaytarmağa hazırdır. Ancaq İsrail bu yüksəklikləri yalnız 10-15 ildən sonra qaytarmaq istəyir.

“Əl-Carida” qəzetinin yazdığına görə, bu təklif İsrail baş naziri Benyamin Netanyahunun Suriya prezidenti Bəşər Əsədə yazdığı məktubda yer alıb. Həmin məktub fransız diplomat Jan-Klod Kusseran vasitəsilə Bəşər Əsədə çatdırılıb.

Digər ərəb qəzetləri isə bu gün işıq üzü görən saylarında yazırlar ki, cümə axşamı ABŞ prezidentinin Yaxın Şərq üzrə xüsusi nümayəndəsi Corc Mitçell Dəməşqə gedəcək İsrail-Fələstin sülh danışıqları barədə Suriya prezidenti məlumatlandıracaq. Danışıqlar zamanı Suriyanın İsrail-Fələstin danışıqlarına verə biləcəyi mümkün töhfə barədə də müzakirə aparılacağı proqnozlaşdırılır.