“Mossad” rəhbərinin ifadə verməsi tələb olunur

Bu ilin mayında Qəzzaya yardım aparan gəmilərə edilən hücumu araşdırmaq üçün yaradılan İsrail komissiyası Türkiyənin “Mavi Mərmərə” gəmisinin kapitanının ifadəsini almaq istəyir.

Lent.az-ın trt.net.tr saytının Azərbaycan versiyasına istinadən verdiyi məlumta görə, daha öncə baş nazir Benyamin Netanyahu, müdafiə naziri Ehud Barak və Silahlı Qüvvələrin Baş Qərargah rəisi Eşkenazinin ifadəsini alan Yakob Türkel rəhbərliyindəki komissiya türk tərəfinin şahidlərini də dinləmək niyyətindədir.

Komissiya kapitanın ifadəsini almaq üçün Təl-Əvivdəki Türkiyə səfirliyinə müraciət edib. “Mavi Mərmərə”nin kapitanı bu tələbi qəbul edərsə, komissiya tərəfindən ifadəsi alınan ilk xarici şəxs olacaq.

Bu arada İsrail daxilində Türkel komissiyası ilə “Mossad” arasında ifadə böhranı yaşanır. Komissiya həm “Mossad”dan gəmini durdurma səyinə dair məlumat və sənədləri tələb edir, həm də “Mossad”" rəhbəri Meir Daqanın ifadə verməsini tələb edir. “Mossad” isə bununla bağlı dəfələrlə edilən yazılı və şifahi çağırışlara cavab vermir. Böhrana müdaxilə edən Nazirlər Kabineti “Mossad”a komissiyanın tələblərini yerinə yetirməsi haqda təlimat verib. Baş nazirin ofisi sənəd və məlumatların komissiyaya təslim ediləcəyini də açıqlayıb.