İranda “Allaha müharibə elan edən” hüquq müdafiəçisi azadlığa çıxdı

“Allaha müharibə elan etmək” və İran rejiminə müxalif mövqedə olan Xalqın Mücahidləri Təşkilatı ilə əlaqə qurmaq ittihamları ilə günahlandırılan hüquq müdafiəçisi Şiva Nazar Ahiri 500 min dollar girov müqabilində azadlığa çıxıb. Lent.az-ın İranda yayımlanan “Arman” qəzetinə istinadən verdiyi məlumata görə, xanım hüquq müdafiəçisi keçən ilin dekabr ayında islahatçı Böyük Ayətullah Hüseyin Ali Muntazerinin dəfn mərasiminə qatılmaq üçün Qum şəhərinə gedərkən saxlanılıb.

İranda “Allaha müharibə elan etmək” suçu ölümlə cəzalandırılır. İnsan hüquq müdafiəçiləri, ziyalılar və jurnalistlər İran hakimiyyətini Şiva Nazar Ahirinin azadlığa buraxmağa çağırmışdılar.

Qeyd edək ki, hüquq müdafiəçisi keçən ilin iyun ayında da prezident seçkilərində saxtakarlığa yol verildiyi yönündə müxalifətin iddialarını müdafiə etdiyi üçün həbs olunub, 3 ay Tehrandakı Evin həbsxanasında saxlanıldıqdan sonra azadlığa buraxılıb.