Azərbaycanlı qadın Ramazan ayından sonra edam ediləcək

İranda millyətcə azərbaycanlı olan 43 yaşlı Səkinə Məhəmmədi Aştiani Ramazan ayı başa çatandan sonra edam ediləcək. Lent.az-ın “BBC”yə istinadən verdiyi məlumata görə, bunu Səkinə Məhəmmədi Aştianinin vəkili söyləyib.

Vəkil bildirib ki, keçən həftə 99 qırmanc cəzası almış Səkinə Məhəmmədi Aştiani Ramazan ayının bitməsi ilə hər an edam edilə bilər.

Səkinənin azad edilməsi üçün Fransa və İtaliya xüsusi səy göstərir. Onu edamdan qurtarmaq üçün hər şey etməyə hazır olduğunu söyləyən Fransanın xarici işlər naziri Bernard Kuşner lazım gələrsə, Tehrana belə gedəcəyini dilə gətirib. Vatikan da Səkinənin həyatının bağışlanması üçün Tehranla diplomatik danışıqlara hazırlaşır.

Qeyd edək ki, Səkinə 2006-cı ildə xəyanətdə və həyat yoldaşının qətlində ittiham edilib. O, əvvəlcə günahını etiraf etsə də, sonradan etirafın ondan təzyiq altında alındığını bildirib. Səkinə başı açıq şəkillərinin yayımlanmasında da ittiham olunur. Fotolardakı qadının başqası olduğu bildirilsə də, İran rəsmilərinin qərarı dəyişməyib. Artıq onlarla hüquq müdafiə təşkilatı, eləcə də bir çox ölkələr İran hökumətinin qərarını tənqid edib.