Pakistanda yeni sel fəlakəti gözlənilir!

Pakistanı növbəti sel fəlakəti gözləyir. Lent.az-ın “trt.net.tr” saytının Azərbaycan versiyasına istinadən verdiyi məlumata görə, Ramazan Bayramına qısa müddət qalmış yeni bir sel fəlakətinin qapıda olduğu haqda açıqlamalar Pakistan xalqını qorxudur.

Çadır düşərgələrində səfalət içərisində yaşayan insanlar tapdıqları traktor və ulaq arabaları ilə daha təhlükəsiz yerlərə getməyə çalışırlar. Vasitə tapa bilməyib çadır düşərgələrində qalmağa məcbur olanlar isə yoluxucu xəstəlik təhdidi ilə üz-üzədirlər

Bu arada BMT sel fəlakətinin yaşandığı Pakistana edilən beynəlxalq yardımların kifayət etmədiyini açıqlayıb. Təşkilatdan verilən açıqlamada seldən zərər çəkənlər üçün təcili qida, tibbi ləvazimat, sığınacaq və təmiz su təminatına ehtiyac olduğu, yüz milyonlarla dollarlıq yeni yardım paketinin zərurətə çevrildiyi bildirilib. Selin vurduğu qorxunc zərərin gedərək ağırlaşdığı bildirilən açıqlamada keçən ay tələb edilən 460 milyon dollarlıq yardım paketinin ən azı ikiqat artırılması tələb edilib.

BMT baş katibinin Pakistana yardım işlərini koordinasiya etmək üçün səlahiyyət verdiyi xüsusi nümayəndəsi Jan Mauris Ripet İslamabadda keçirdiyi mətbuat konfransında indiyə qədər 310 milyon dollar toplandığını bildirib. O, bu rəqəmin kifayət etmədiyini, 8-10 milyon insanın təcili yardıma ehtiyac duyduğunu qeyd edib.

Qeyd edək ki, tarixinin ən böyük fəlakətini yaşayan 180 milyonluq Pakistanda seldən zərər çəkənlərin sayı 20 milyon nəfərdən çoxdur. Coğrafi əngəllər və selin səbəb olduğu mənfi şərtlər səbəbilə hələ 3 milyon insana yardım çatdırmaq mümkün olmayıb.